Maiatzaren 15ean Renfek trenen ordutegiak aldatu zituen eta horrek eragina izan du Urduñako bidaiariengan. Izan ere, orain ezin dute C-3 lineako azken trena hartu eta Bilbotik Urduñara doan azken zerbitzua 22:35ekoa da.
Urduñako erabiltzaile batzuk harremanetan jarri dira Aiaraldea Komunikabidearekin eta azaldu diote trena hartzeari utzi egin diotela, lanagatik ezin baitzuten 22:35eko trenea hartu. Ondorioz, autoa baliatzeari ekin diote.
Renfek arrazoi teknikoak argudiatu ditu ordutegi aldaketa hori egiteko. Izan ere, Saratxo eta Urduña artean ari dira lanak egiten. Horregatik, 23:35eko trena ez da Urduñara heltzen eta Amurrion gelditzen da.
Azken tren hori hartzeko aukera kentzeaz gain, atzerapenak are ohikoagoak bilakatu dira Renfeko zerbitzuan
Horrez gain, nabarmentzekoa da maiatzaren 15ean ordutegi berria indarrean sartu zenetik, atzerapenak are ohikoagoak bilakatu direla zerbitzuan.
Berez, ez da urduñarrek salatu duten lehen arazoa Renferen jarrer dela-eta. Izan ere, Udalak enpresari eskatu zion zerbitzu berezia eskain zezan otxomaioetan eta hark uko egin zion.
Udalaren adierazpena
Itziar Biguri alkateak azaldu dio Aiaraldea Komunikabideari azken asteetan kexa ugari jaso dituztela Urduñako Udalean ez bakarrik azken trena kentzearen ondorioz. Herritarrak kexu agertu dira atzerapenengatik eta beste tren batzuk ere kendu dituztelako. Udalak Renferi bideratu dio ezinegon hori, baina Bigurik salatu du enpresaren aldetik ez dutela "inolako erantzunik jaso".