Bermagoko Polisportiva Monterroso futbol klubeko jokalari gazteenak Urduñan egongo dira bihar arte, Antzinako Andra Mari Ikastetxeak gonbidatuta. Izan ere, hezkuntza zentroak Lombardiako hiri horrekin harreman estua dauka aspaldi eta Lanbide Heziketako ikasleak edota beste kirolari batzuk ere aurretik egon dira hirian horri esker.
Monterrosoren bisitarekin, ordea, emakumezko kirolarien ordezkaritza lehenengo aldiz Urduñara bertaratzea lortu dute eta pozik daude mugarri horrekin. Guztira, 11 eta 14 urte bitarteko 39 neska daude Urduñan, eta zazpi heldu.
Harrera ofiziala
Larunbat eguerdian bertaratu ziren hirira futbolariak eta berehala harrera ofiziala egin zieten alkateak eta Antzinako Andra Mari Ikastetxeko zuzendariak. Bazkaldu ostean lagunarteko futbol partidak jokatu zituzten Arbietoko futbol zelaian CD Orduña eta Menesianos klub bilbotarraren kontra.
Atzo San Mames ezagutzera joan ziren Bizkaiko hiriburura eta, horrez gain, Athletic Clubeko lehen taldeko zenbait jokalarirekin izan zuten topaketa. Arratsaldean, aldiz, turismora bideratu zuten denbora librea.
Gaur Getxora jo dute eta bihar goizeko lehen orduetan utziko dute hiria, Italiara itzultzeko.
Argazkiak: Antonio Muñoz