Ostiralean inauguratu zuen Javi Irabienek Bizitza propioa duten makilak erakusketa Orduña Hiria Museoan. Hainbat lagunek parte hartu zuten ekimenean, udal gobernu taldeko kideek barne.
Javi Irabienek "80-100 lan inguru" batu ditu museoan eta gehienak makilak dira. Hala ere, eskulanak eta animalien adarrekin egindako objektuak daude, baita makuluak ere.
Irabienek etxean zituen piezak eraman ditu museora, baina baita erakundeentzat edo herritarrentzat egindako makilak ere: "Urduña, Amurrio, Arrastaria edota Lendoñoko alkateen makilak daude. Horrez gain, osatzear dagoen udal batena ere badago, Usansolokoa, alegia".
Irabienek aldarrikatu nahi du guztiak direla artisau lanak, erantsitako grabatuak salbu, horiek ez baititu berak egiten: "Gainerakoa nik egiten dut".
Pieza bat nabarmentzeko orduan, egileak Amurrioko alkatearen makila aipatu du: "Denbora gehien eraman didana izan da, ez egurra lantzerako orduan, baizik eta tokikoak ez diren egur batzuk dituelako. Esaterako, boj egurra dauka eta uretan sartu behar izan nuen tratatzeko".
Artistak argitu du makilak berak adierazten duela Amurriok izan duen eraldaketa XX. mendean: "Amurrio landa eremuko herria zen, abeltzaintzan eta nekazaritzan zentratua, eta industrializazioarekin erabat aldatu zen. Hori adierazi dut erabilitako materialen bidez, besteak beste. Makilak berak istorio bat kontatzen du".
Hitzaldia irailaren 22an
Irabienek bere aitarekin ikasi zuen nola egiten ziren makilak, baina denboraren poderioz jakintza gehiago eskuratu ditu eta ulertu du nola erantzuten dien egurrak teknika ezberdinei. Hori guztiari buruz mintzatuko da irailaren 22an Orduña Hiria Museoko areto nagusian, 18:00etatik aurrera.
Argazkiak: Orduña Hiria Museoa