Urriaren 6tik hasita azaroaren 12ra arte luzatuko da Urduñako Mendi Fest Jaialdia. Hasiera, edonola ere, indartsua izango da. Ibilbide botanikoa eskainiko dute Loraldi elkartearekin elkarlanean eta gero, 19:00etan, Alex Txikonek, alpinista bizkaitarrak, hitzaldia emango du Alondegian.
Gaur bertan ere inauguratuko dute Alondegiko Areto Nagusian egongo den argazki erakusketa, azaroaren 12ra arte egongo dena, hain zuzen.
Egitaraurekin jarraituz, irailaren 23an inauguratutako boulderraren aurkezpena egingo dute, nahiz eta dagoeneko zabalduta egon, azalpen formalak emateko momentua egongo da urriaren 20an.
Hilaren 27an, aldiz, zinema saioaren txanda etorriko da. 18:30ean hasiko da eta bi ikusentzunezkoz gozatzeko aukera egongo da. Monarca expedition: un vuelo vivac récord del mundo eta Kilimanjaro, una experiencia inclusiva filmak, hurrenez hurren.
Azaroaren 3an Urduñako emakume kirolariak batuko dira eta Alondegian bertan hitzaldi informala eskainiko dute bertaratu nahi duen edozeinentzat. Ekintza horrekin, hurbiltasuna ere helarazi nahi dute, kirolariak diren emakumeek egingo dute berba eta ez dute zertan profesionalak izan.