Urduñako Alde Zaharreko ibilgailuen trafikoak jarraitzen du gatazka politikorako gaia izaten. Hain zuzen, EH Bilduk oharra zabaldu du herritarren etxeetan eta komunikabideen artean, egungo udal gobernu taldeari exijitzeko Alde Zaharra oinezkoentzako gunea izatea.
Koalizioaren aburuz, "badirudi ez garela jabetzen Bizkaiko Erdi Aroko herrigunerik handiena dugula, XII. mendekoa, 1997an Multzo Historiko-Monumentala izendatu zena, eta autoek kalte baino ez diotela egiten. 2000. urtean, plaza eraberritu zenean, arkitektoaren azken txostenak hau zioen: 'Azpimarratu behar da nagusiki oinezkoentzako plaza bat aukeratu dela (...); obrek ez dute behar bezala funtzionatuko, ibilgailuen igarobideari jarritako muga bete ezean'. Sinestezina dirudi, baina, 23 urte geroago, plaza oinezkoentzat izateari buruz eztabaidatzen jarraitzea".
Horrez gain, EH Bilduk uste du Alde Zaharra oinezkoentzako gunea bilakatzeak (auzokideei autoz sartzeko aukera emanda), umeen eta herritarren segurtasunean eragiten duela eta tokiko merkatarien mesederako ere badela.
Horregatik guztiagatik, honakoa eskatu dio opozisioko taldeak EAJko udal gobernuari: "Izan dezagun ausardia politikoa eta egin dezagun aurrera behingoz, hirigune historikoa oinezkoentzat izan dadin %100ean, gaur egungo munduan egon nahi badugu behintzat, non egunero ikusten dugun oinezkoentzako guneak irekitzearekin batera ibilgailuei zirkulazioa galarazi egiten zaien".
Aldarrikapenaren arrazoia
Udal hauteskundeen kanpainan talka ekarri zuen Alde Zaharreko trafikoaren kudeaketak eta egungo EAJko udal gobernu taldeak adierazi du hori arautzeko prest dagoela. Hain zuzen, inkesta bidali du etxeetara eta LEBER enpresarekin ari da lanean horretan, herritarren mugikortasun ohiturak ezagutzeko, lehenik eta behin.
Edonola ere, EH Bilduk aldarrikatu du enpresa horrekin aurreko legealdian ere ari zela lanean Udala eta argudiatu du inkestak aurreko udal gobernu taldearen ideia izan zirela, baina ez zutela inondik inora aurreikusten trafikoa Foru plazara itzultzea.