Helena Taberna zinema zuzendari beteranoak Urduña hautatu du bere film berrian agertu dadin. Izan ere, gaur hirian grabatzen ari da Nosotros proiektu berria. A-2625 eta A-2521 errepideetan eten dute trafikoa zenbait unetan goizean eta hiriko jendea ere kontratatu dute estra lanak egiteko.
Bilbo, Bakio edota Barakaldo ere agertuko dira filman eta grabaketak azaroaren 10ean bukatuko dituzte.
Nosotros
Tabernaren pelikula berria Isaac Rosa kazetari eta idazlearen Feliz final eleberrian oinarrituta dago. Liburuak bikote baten banaketa deskribatzen du atzekoz aurrera. Hau da, jadanik harremana apurtu denean abiatzen da eta apurka-apurka euren amodio istoriaren hasierara jotzen du.
Antzezleak: Maria Vazquez eta Pablo Molinero
Pelikularen protagonistak Maria Vazquez eta Pablo Molinero dira. Biak aurpegi ezagunak dira zineman eta telebistan. Esaterako, Vazquezek Matria filma estreinatu du aurten eta Fariña telebista saioan agertu da, besteak beste.
Pablo Molineroren lan ezagunena La peste telasaioan eginikoa da, berak hezur-haragitzen baitzuen pertsonaia nagusia.
Helena Taberna
Helena Taberna altsasuarrak hainbat proiektu gauzatu ditu, interes politiko edo soziala tarteko beti. Horrela, Yoyes pelikula egin zuen, Nagore (Nagore Laffagen erailketa matxistari buruzkoa), Extranjeras edota La buena nueva.