Urduñako Mendi Lasterketaren VI. edizioa izango da igandean 09:30ean. Dagoeneko 500 kirolarik bete dute izen-ematea eta hiru diziplina eskainiko ditu antolakuntzak, hau da, Gualdetxu taldeak.
Hasteko, bi aukera egongo dira 33 kilometroko ibilbidea betetzeko; banaka edo erreleboka. 1.750 metroko desnibelari egin beharko diote aurre lasterkariek eta Gorobeleko toki enblematikoak igaroko dituzte, Fraileburu edota Ponata, esaterako.
Horrez gain, proba herrikoia ere egingo dute, 14 kilometrokoa. Honek desnibel askoz txikiagoa izango du, 550 metrokoa, eta azkar eta bidezidor eta basoen artean egiteko pentsatuta dago.
Helmuga
33 kilometroko ibilbidea betetzeko bost ordu eta erdi egonda ere, antolakuntzak espero du 14 kilometroko parte hartzaileak 11:00etan heltzen hastea eta aukera luzeagoan daudenek 12:00etatik aurrera egitea.
Toki bereziak
Lasterkariei dagokienez, antolatzaileek uste dute Fraileburu eta Bedarbideko igoerak oso politak izango direla. Ibilbide herrikoian, aldiz, San Vitores aterpeko inguruak goraipatu dituzte.
Ikusleentzat, aldiz, La Txozako gaina oso egokitzat jo dute: "parte hartzaileak igaroko dira eta gainera erreleboetako aldaketa ere bertan egingo da, espero dugu giro polita sortzea".
Horrez gain, laguntzaile ugari egongo dira ibilbidean zehar korrikalariei animoak emateko.