Udal eraikinetan eguzki plakak jartzeko apustua egin nahi du aurten Artziniegako Udalak. Horretarako, 36.700 euroko diru-laguntza jaso berri du tokiko erakundeak Eusko Jaurlaritzako Hezkuntza Sailaren partetik. Diru horren bidez, Arteko Gure Ama hezkuntza zentroan jarriko dituzte panelak.
Udan egingo dituzte horretarako lanak, klaserik ez dagoela probestuz. Hala ere, harago joan nahiko luke tokiko erakundeak, beste kokaleku batzuetan (frontoian eta kiroldegian) ere mota horretako azpiegiturak aurten jarri daitezkeen aztertuz, "proiektu bakoitzaren proposamenak eta aprobetxamenduak aztertu ondoren".
2024rako udal aurrekontuak prest
Udalak abendu amaieran onartu zuen 2024rako aurrekontua, EH Bilduren aldeko botoekin eta EAJren abstentzioarekin. 2.109.328 euro baliatuko ditu guztira tokiko erakundeak.
Nabarmendu dutenez, ez dute inbertsio berririk egitea aurreikusten, baina jada abian dauden hainbat obra amaitzea espero dute:
- Kultur Etxearen eraberritzea
- Arteko Landaren etxolen eraberritzea
- Adinekoentzako eguneko arretarako zentro berria eraikitzen hastea
- Bideak egokitzen jarraitzea
- Luberriak ixtea
- Argiztapen publikoa hobetzea
- Uretaraino ur-hornidurako sare berriaren proiektuari ekitea
- Arteko Gure Ama ikastetxeko eta haurreskolako patioan hobekuntzak egitea
Bestalde, partida berriak barnebildu dituzte plangintza ekonomikoak. Alde batetik, eskolako umeei arreta psikopedadogikoa emateko dirulaguntza handituko dute; eta, bestetik, partida berri bat sortu dute museo etnografikoaren 40. urteurreneko ospakizunetarako.