Urtarrilaren 31n burutu zuten Urduñako urteko lehenengo Udal Osoko Bilkura, non, nagusiki, 2024ko aurrekontuak eztabaidatu ziren. Udalbatzaren ostean oharra plazaratu du EH Bilduk, bertan jazotakoaren irakurketa eginez.
EAJk aurkeztutako aurrekontuetako inbertsio apurrak aurreko legealdikoak direla azaldu du EH Bilduk. "Udalaren egoera ekonomikoa prekarioa dela, oraindik ere pairatzen ditugulako EAJk duela legegintzaldi batzuk utzitako zor kontrolatugabearen ondorioak. Horregatik, aurrekontuek ia-ia ez dute inbertsiorako gaitasunik, eta esan dezakegu aurreko legegintzaldiaren jarraipena direla", zehaztu dute oharrean.
Udal Gobernuak aurkeztutako dokumentazioa osatu gabea zela azaldu du ere oposizioko taldeak, ez zuelako Foru Arauan zehaztutakoa betetzen. Edonola ere, EH Bilduk adierazi du hori ez zela inola ere kontuak ez babesteko arrazoia, "aurrekontuak ezinbestekoak baitira udalerriaren funtzionamendurako".
Zortzi emendakin
EH Bilduk zortzi emendakin aurkeztu zizkien guztira aurrekontuei. Emendakin hauek "behar bezala aztertuak eta justifikatuak, aurreko legealdiko esperientzian oinarrituak, eta guztiz beharrezkoak" zirela azaldu du oposizioko taldeak. Besteak beste, zuhaitz gehiago erostea, zenbait bideetan zoladura berria jartzea edota Gazteen Kontseilua sortzea proposatzen zuten zuzenketek. Baina EAJak proposamen horien guztien aurka bozkatu zuen, oposizioko taldeko kideek salatu dutenez.
EH Bilduk galdera plazaratu dio Udal Gobernuari: "Justifikaziorik gabeko ezezkoa nagusituko da bilkura guztietan? Sistematikoki baztertzen dituen eta erabakiak herritarrak kontuan hartu gabe hartzen dituen jarduera-moduak eredu batera garamatza?"
Galde-eskeetan tentsioa
Galde-eskeen txandan EH Bilduk Mugikortasun mahaia sortzea proposatu zion Udal Gobernuari, "herrigune historikoko trafikoa arautuko duen ordenantza berriaren eta, bestetik, ikastetxearen eta plazaren artean irabazitako oinezkoentzako gunea berriro irekitzeko ideiaren" inguruan eztabaidatzeko nagusiki.
Iker Santocildes alkateak ezezkoa eman zion proposamenari. Gobernuburuaren erabakiak udalbatza aretora bertaratutakoen artean "tentsioa eta gaitzespena" sortu zituela azaldu du oposizioko taldeak. "Inolako iradokizunik jasotzeko aukerarik eman gabe, alkateak harrokeriaz eta larderiaz adierazi zuen erabakia hartuta dagoela, eta kito!", nabarmendu du EH Bilduk plazaratutako oharrean.
"Proposamenen bazterketa sistematikoa"
EH Bilduren hitzetan, bilkura "desatsegina" izan zen urtarrilaren 31koa, EAJk oposizioaren proposamenak "sistematikoki baztertu zituelako". Gauzak hala, koalizio subiranistak hurrengo galdera plazaratu dio Udal Gobernuari: "Justifikaziorik gabeko ezezkoa nagusituko da bilkura guztietan? Sistematikoki baztertzen dituen eta erabakiak herritarrak kontuan hartu gabe hartzen dituen jarduera-moduak eredu batera garamatza?"
EH Bilduk, bere aldetik, oposiziotik lanean jarraituko duela aldarrikatu du: "Lanean jarraituko dugu, Urduña hobe dadin proposatuz eta lagunduz. Horrela ulertzen dugulako tokiko politika. Azken batean, gu ere herriaren zati garrantzitsu baten ordezkari gara".