Larunbateko gaua modu gatazkatsuan amaitu zen Urduñan. Izan ere, Ertzaintzak bi gizonezko atxilotu zituen eta agintaritzaren aurkako atentatua leporatu zien. Poliziak oharra plazaratu zuen atzo bere bertsioa azaltzeko, baina Aiaraldea Komunikabidearekin harremanetan jarri diren zenbait herritarrek ere eurena eman nahi izan dute.
Izan ere, taberna barruan zeuden pertsonek adierazi dute polizia ez zela agertu zarata zegoelako, sarekada egiteko baizik: "Guztiok identifikatu eta miatu gintuzten. Batzuk hormaren kontra jarri zituzten eskuak altxatuta".
Halaber, herritar horiek ukatu dute modu bortitzean hartu izana ertzainen agerpena. "Dozena bat sartu ziren eta hasieran dena oso lasaia izan zen. Are gehiago, hormaren kontra ez zeudenek jai giroan jarraitu zuten", aipatu dute. "Inork ez zien ezer bota", azpimarratu dute.
Liskarrak beranduago
Tabernako kontsumitzaileek erantsi dute ertzainek ordubete baino gehiago hartu zutela jendea miatzeko eta horregatik haserretu zirela herritarrak. Antza, ateratzean horietako bat berotu zen, barruan bere arrebak jarraitzen zuelako eta emakumezkoak antsietate krisialdia zuelako.
Herritar batek salatu du bi foamezko balen tiroak jaso zituela bi metro eskaseko distantziarekin.
Orduan hasi ziren liskarrak kanpoan zeuden ertzainekin eta kolpeak eman ez ezik, foamezko balak ere baliatu zituzten agenteek, herritarren aburuz. Zehazki, herritar batek salatu du berak bi tiro jaso zituela bi metro eskasetako distantziarekin: "Batak bularrean eman zidan eta besteak besoan. Apur bat gorago joango balitz aurpegian jasoko nukeen kolpea", esan dio herritarrak Aiaraldea Komunikabideari.
Herritar horrek bidali ditu albiste honetan dauden irudiak. "Joan zirenean foamezko balen zorroak jaso nituen", gehitu du urduñarrak.
