Abuztuaren 30ean eta 31an ospatuko da Urdufolk jaialdiaren XII. edizioa. Joseba Urruela antolatzaileak azaldu duenez, bostehundik gora proposamen jaso dituzte aurten, eta beste urteetan egin duten formatu berdina planteatu dute: nazioarteko talde batek jotzea gutxienez, euskal talde bat, Galiziako talde bat eta beste urte askotan ekarri ohi duten Asturiaseko gaiten banda.
Euskal taldeari dagokionez, Aldapeko basque latin jazz taldeaz gozatzeko aukera egongo da abuztuaren 30ean, 21:15ean Foru plazan.
Balkan paradise orchestra izango da aurtengo nazioarteko taldea. Honek ere abuztuaren 30ean eskainiko du kontzertua, Aldapeko basque latin jazz-en ostean, oholtza berean.
Kataluniakoa den Hidra taldea “oso potentea” dela nabarmendu du Urruelak. Banguardiako musika egiten dute, eta haiek ikusteko aukera egongo da abuztuaren 31an, 21:15ean, toki berean.
Urruelak aitortu duenez, Galiziako talde bat ekartzea gustatzen zaie, eta aurten Os d´abaixo taldeak beteko du espazio hori. “Galiziako folk tradizionala egiten dute, baina modernoagoa”, nabarmendu du antolakuntzako kideak. Abuztuaren 31an izango da ikuskizuna, Hidra taldearen ondoren, Foru plazan.
Bukatzeko, beste urte askotan bezala, Asturiaseko El Trasno gaiten banda ekarriko dute. Ostiralean eta larunbatean arituko da kalejiran hirian barrena.