Aulki bana hartu eta plazara abiatu ziren bart ehunka urduñar. Pantaila erraldoi bat zegoen hantxe haien zain, martxoan hirian filmatu zuten Ibon Cormenzanaren El bus de la vida pelikula proiektatzeko prest.
Filmarekin hasi baino lehen, ordea, Cormenzana beraren eta filmaren antzezle-taldearen parte diren Susana Abaitua, Elena Irureta, Pablo Scapigliati eta Julen Castilloren txanda izan zen, eta esker oneko hitzak zuzendu zizkieten Urduñako hiritarrei.
Barre eta malko artean igaro zuten hurrengo ordu eta erdia, eta Urduñako hainbat kale eta paisaiez gain, hiritar asko ere ikusi ahal izan zituzten pantaila handian. Behin proiekzioa amaitu zenean, Dani Rovira protagonistaren bideo batek harritu zituen bertaratutakoak. Rovirak ere eskerrak eman nahi izan zizkien urduñarrei.
Gaua borobiltzeko, oholtzara igo ziren Manuela Velles, filmeko jatorrizko abestien sortzailea, eta beste aktore batzuk, Pablo Scapigliati eta Julen Castillo tartean. Pelikulan agertzen diren kantak abestu zituzten eta giro ederra eraman zuten Urduñako plazara.
Gaur iritsi da filma zinema areto komertzialetara. Hemen ikusi daiteke trailerra:
Argazkiak: @victor_frames ©