Maria Jose Ardanaz artista bilbotarrak erakusketa inauguratu du Urduñako Museoko Fede Ruiz Arte Erakusketen Aretoan, eta datorren urteko urtarrilaren 6ra arte egongo da zabalik. Ardanaz Urduñan bizi da, eta bertan du pintura estudioa.
A mi aire izeneko erakusketa atzera begirakoa da eta bere ibilbideko esperimentazio guztietako lanak erakusten ditu, berak dioen bezala, askotarikoa dena: "Pintatzen dut aurrez finkatutako metodoei jarraitu gabe, margotzearen plazer hutsagatik. Nire nahia forma berriak, bitarteko berriak, bide berriak esperimentatzea da. Horregatik, nire obra erabat anarkikoa da, erakusketa honetan ikus daitekeenez".
Koldo Badillo aretoko arduradunak koordinatutako erakusketak bere ibilbide osoko hogeita hamar koadro inguru aurkeztu ditu, hainbat gai eta estilorekin: erretratuak, paisaiak, bodegoiak, tauromakia...
Gainera, ez da margoketan bakarrik zentratu. "Hainbat adarretan nabigatu dut: argazkigintzan, marrazkigintzan, buztinarekin modelatzean, lozan, portzelanan, idazketan, koadernaketan, diseinuan, jantzigintzan eta diseinu digitalean, baina nire pasioa pintura da", aitortu du sortzaileak.
Maria Jose Ardanaz artista
Ardanaz aurretiko erretiroa hartu ondoren hasi zen pintura serio hartzen eta, ikaskideen harridurarako, Arte Ederretan lizentziatu zen EHUn 2010ean, bere promozioaren "amona" bilakatuta.
Erakusketa berri honekin, Urduña Hiria Museoaren helburua da artearekiko pasioa sustatzen eta Urduñako eta Euskal Herriko artistak omentzen jarraitzea.