Bihar Urduña City Cross 2024 egingo dute Foru Plazan eta inguruetan. Hiriguneak eta landa-eremuak uztartuz, 3.300 eta 3.400 metro bitarteko erronka-zirkuitua sortuko dute. Hain zuzen ere, Foru Plazatik, harresitik, Harategi kaletik eta Juan de Garay kaletik igaroko da, eta Foru Plazan amaitu. Kirolez eta jai-giroz beteriko eguna izango da.
Goizeko 09:30ean emango diote hasiera aurtengo City Crosss-ari, eta eguerdiko 12:00ak bitarte Txiki Kopa jokatuko dute eskola kiroleko umeek. Jarraian, 12:30ean, Kadeteen txanda izango da, 13:15ean, berriz, Gazteena, 15:00etan Masterrak ibiliko dira, eta 16:00etan OPEN emakumezkoak.
Arratsaldeko 17:15ean Turbocross lasterketa berria egingo dute, ez da lehiakorra izango eta ehun txirrindularik bi itzuli emango dizkiote zirkuituari. Eredu hau publiko guztiarentzat pentsatuta dago eta kirolaren dibertsioa eta gozamena sustatzea du helburu.
Parte-hartzaileek mozorrotuta, taldeka edo banaka, MTBko bizikletekin edo ziklo-krosekin lehiatu dezakete eta horrek sormenez eta alaitasunez betetako ikuskizuna bermatzen du.
Arratsaldeko 18:00etan Elite eta Sub 23 kategorien txanda izango da, eta 19:30ak aldera emango zaio bukaera aurtengo Urduña City Cross-ari.
Kaleetan trafikoa etengo dute
Hainbat kaletan trafikoa ez da baimenduta egongo proba dela eta. Goizeko zazpietatik arratsaldeko zazpietara, Harategi, Burgos, Zaharra, Correos, Juan de Garai, Adoberias eta Foru Plaza errepideetan ezingo dira igaro ibilgailuak, eta oinezkoentzako sarbidea baino ez da egongo.
Beraz, Harategi kaletik ezingo da autoa atera proba bukatu arte, Juan de Garai auzoan ibilgailua aparkatuta duten bizilagunek Tras Santiagoren atzetik (harresiaren ondotik) irteera izango dute.
Bestalde, Udalak bandoak jarriko ditu trafiko-mozketengatik kaltetutako atarietan.
Jai-giroa
Egun osoan Foru Plaza jai giroak hartuko du, txosna, kontzertuak eta beste hainbat ekintza egongo baitira. Bi pasabide jarriko dira, ikusleak plazaren erdira sar daitezen lasterketa ikusi ahal izateko.