“Lurra, herria, eskola ERROTU” lemapean aurkeztu da gaur goizean 2025eko ekainaren 1ean Uduñan ospatuko den Euskal Eskola Publikoaren 32. Jaia. Aurkezpenean Urduña Herri Eskolako IGEko eta zuzendaritzako ordezkariek, Urduñako Udaleko ordezkariak eta Lurdes Imaz EHIGEko koordinatzaileak hartu dute parte. Bertan egon dira ere Aiaraldeko eskola publikoetako IGE eta zuzendaritzen ordezkariak. Ordiziaren lekukoa hartuta, indarrez dator Euskal Eskola Publikoaren 32. Jaia Urduñara.
“Jai honek gure eskola publikoa euskal hezkuntza sistemaren erdigunean kokatzeko helburua du, gure belaunaldi berrien hazkuntza eta garapena bermatuz”, adierazi dute Urduña Herri Eskolako ordezkariek, eta gonbidapena luzatu dute: “Euskal Eskola Publikoaren 32. Jaia ospatzeko denon parte-hartzea ezinbestekoa da. Gonbidapena luzatzen dizuegu egun honetan parte har dezazuen eta gure helburu kolektiboen alde elkarrekin lan egiteko aukera aprobetxa dezazuen”.
Leloa eta irudia
“Lurra, herria, eskola ERROTU” da jaiaren leloa. Lelo honen bidez lurrean eta herrian txertatuta dagoen hezkuntza-eredu publikoa aldarrikatu nahi dutela azaldu dute.
- LURRA: Elikadura erdigunean. 2018-2019 ikasturtean jarri zen martxan Urduñako eskola-jantokiaren proiektu pilotua. Bide horretatik jarraitzeko, eskolan sukalde propioa izatea eskatzen dute, oraingoa eskola ondoan dagoen zaharren etxean dagoelako.
- HERRIA: Urduñako hiritarrek orain 30 urte herri-eskola sortu zuten, publikoa izango zen eskola batek soilik bermatu zezakeela belaunaldi berrien euskalduntzea iritzita.
- ESKOLA: Sistema publikoaren aldeko instituzioen apustu irmoaren beharra dute beharrei erantzungo dieten baliabide eta zerbitzuak eskaintzeko: azpiegitura egokiak, haurreskolerako ordutegi zabal eta malguak…
Xabat Agirrek egin du diseinua kontzeptu horietan oinarrituta:
- Lurra zuhaitz baten bidez irudikatzen da
- Herria, arrosa koloreko etxe baten bidez
- Eskola, liburuxka hori baten bidez
- Jangelak, sagar baten bidez
- Esfera batean barnebiltzen dira irudiak, lurra, mendiak eta zerua irudikatzen duten formekin batera
Guneak
2025eko Jaiak lau gune eta ohiko gune ibiltaria izango ditu. Jaiaren gune izango dira Foru plaza, museoaren plaza, Gernika plaza eta eskola.
Honako ekintzak egongo dira:
- Txikien eta gazteen gunea: puzgarriak, tailerrak…
- Gernika plaza: bazkari gunea
- Kale animazioa: musika, kalejira, kale antzerkia…
- Foru plaza: “Pirritx, Porrotx eta Marimotots”, tailerrak…
Urduña Herri Eskola
Haurraren mugimendu autonomoa eta esperimentazioa du oinarri eskolak eta eremuka lan egiten du. Gainera, eskola espazio berri naturalizatu batean kokatzen da, ekosisteman murgilduta dagoena. Honako hauek dira ardatzak:
- Euskara: eskolako ardatz nagusia da eta familien partaidetza ezinbestekotzat jotzen dute aurrera egiteko.
- Espazioen birnaturalizazioa: naturarekin kontaktua berreskuratzea, ibilbide pedagogikoak, jolas tokia, ikastokia…
- Denboren naturalizazioa: ikasleen garapenarekiko errespetuzko begirada (mugimendu autonomoa), hezkuntza proiektu berritua (ordutegiak malgutu, proiektuak lehenetsi, ikuspuntu ekosiziala…) eta Agenda 30
- Plan digitala: planaren oinarriak hezkuntz aproiektu berrian integratua egotea eta teknologiaren erabilera arduratsua dira.