Maiatzaren 8an elkarretaratzea deitu duzue Urduñan egingo den zezenketaren kontra, zergatik? Zein da zuen aldarrikapena?
Animalien kontrako tratu txarren alde ez gaudelako kontzentrazio hau deitzea erabaki dugu. Oraingo honetan, badakigu Udalak ekitaldi grotesko honen zati bat diruz lagundu duela eta ez zaigu etikoa iruditzen edozein alderdi politikok, edozein izanda ere, gure kutxako dirua animalien tratu txarrak laguntzeko erabiltzea.
Zer nolako harrera izan du deialdiak?
Deialdiak interesa pizten du, nahiz eta bertaratzeko garaian, gure iritzia partekatzen dugunok baino gutxiago bertaratu ginen, bai herri txikia delako eta euren pertsona edo negozioaren aurkako errepresalien beldur direlako, eta hori ere ez zaigu etikoa iruditzen, gure jarrera adierazteko erabateko askatasuna izan beharko genukeelako eraso pertsonalen beldurrik gabe, jada jaso ditugunak bezala.
Ez da lehen aldia horrelako mobilizazioa antolatzen duzuela, zein izan da zuen esperientzia aurreko elkarretaratzeetan?
Dakizuenez, aurreko aldietan gure esperientzia kontatu dizuegu eta berdin jarraitzen du. Urduritasun eta tentsio handiko uneak dira, ez baitakigu nola hartuko gaituzten. Iraindu, mehatxatu eta errieta egiten digute.
Beti saiatzen gara lasai egoten eta esan behar dugu lehen deialdian oso gutxi ginela eta parte hartzaile kopurua handitzen joan dela, pozten gaitu eta itxaropen handia ematen digunak.
Urduñako taldeak kanpoko taldeekin harremana dauka?
Jakina, gure alde egiten duten eta laguntzen ditugun animalien eskubideen aldeko hainbat elkarterekin harremanetan gaude, hala nola, Veganas Unidas, Libertad Animal Navarra, Durangaldea Antiespecista eta beste hainbatekin. Elkarrekin familia handi bat osatzen dugu eta elkar babesten dugu.