Hitzordu berria dute eskualdeko pilotazaleek. Urduñako Jai-Alai Pilotazale Elkarteak I. Fronoti Txiki "Kaiola" Txapelketa antolatu du ekainaren 12, 14 eta 15erako. Pilota eskolako haurrek ikasturtea maiatzean bukatuko dutela probestuta, udako sasoiari heltzeko ekitaldia prestatu dute, Aiaraldean geroz eta indar gehiago hartzen ari diren pilota goxuarekin jokatutako afizionatu mailako txapelketen olatura batuz. "Publiko horri zuzendutako eskaintza berria prestatu nahi izan dugu", azaldu dio Jai-Alai Pilotazale Elkarteko Karrak Aiaraldea Komunikabideari
Ez dira hutsetik abiatu Urduñako Pilotazale elkarteko kideak. Duela hamar urte Tertangako pilotalekuan ospatzen zuten txapelketaren lekukoa hartu nahi dute egitasmo berri honekin. Aukera desberdinak baloratu ostean txapelketa Urduñako pilotalekuko frontoi txikira eramatera "ausartu" dira, datozen urteetan ere egitasmoa errepikatzeko asmoarekin.
Frontoi txikiko txapelketak partida "bizi eta estuak" ziurtatuko ditu. "Neurriak askoz motzagoak dira frontoi txikian, eta askoz azkarrago jokatu beharra dago. Tantoak egiteko zailtasuna handiagoa da", adierazi dute antolatzaileek.
Izen emateko epea zabalik
Federatu gabeko pilotarientzako txapelketa indibiduala da honakoa, eta dagoeneko zabalik dago izena emateko aukera. Bi kategoria prestatu dituzte; lehenengo eta bigarren maila, eta inskripzio bakoitzak 10 euroko prezioa izango du. Interesa duen orok 688650172 (Karra) telefonoan eman dezake izena. Ekainaren 8ra arte egongo da txapelketara batzeko aukera.
Antolatzaileek txapelketako sariak zeintzuk izango diren aurreratu dute ere. Maila bakoitzeko lehenengo sailkatuek txapela eta txakolin lotea jasoko dute, bigarrenek, aldiz, gazta eta txakolin botila.