Emakumeen Etxea instalatu nahi du Urduñako Udalak Gernika plazan erosi nahi duen lokalean, "epe laburrean". Hala aurreratu du Uxue Mendibil zinegotziak Aiaraldea Komunikabidearen Azalera podcastean eskainitako elkarrizketan.
Hain zuzen, eguneko zentro zaharraren kokalekua izan zen espazio hori eskuratzea izango da tokiko erakundeak aurten egingo duen inbertsio esanguratsuenetako bat, 175.000 euro baliatuko baitituzte orotara.
Mendibilen hitzetan, gune hori "oso egokia da" zeregin horretarako, Gernika plazan kokatua dagoelako eta "jendea gertu izateko aukera" ematen duelako horrek. "Espazio aldetik oso zabala da, eta hitzaldiak, aholkularitza tailerra eta abar egiteko aukera ematen du", azaldu du zinegotziak.
Dena den, udal ordezkariak gaineratu du bertan emakumeen etxea kokatzea "epe laburrerako ideia" dela. "Epe luzerako dugun helburua bada berdintasuna, gizarte-kohesioa edo gizarte politikak bezalako Udaleko arloen bulegoak ere bertan jartzea, irisgarritasunaren aldetik oso aukera egokia delako eta lekua primerakoa delako".
Opozisioko taldea (EH Bildu) ez dago ados lokalaren erosketarekin, eta hori izan zen aurrekontuen bozketan abstenitzeko baliatu zuen arrazoietako bat. Talde subiranistak bere unean azaldu zuenez, lokal hori Kutxabankena da eta "Udalak erosiko ez balu ez luke inoiz saltzerik izango".