Gaur goizean Ainara Basurko, Bizkaiko Foru Aldundiko Ekonomia Sustatzeko foru-diputatuak, Tomás Hernanik eta Aitor Condek, Satlantisko CEOak eta CTOak, Iker Santocildes Urduñako alkateak eta Maria Jesús Pozas Pozas Historian doktorea eta Deustuko Unibertsitateko irakasle seniorrak anbulatorio aurren batu dira Juan de Garairen omenezko monumentua aurkezteko.
Juan de Garaik Ameriketako kolonizazioan garrantzi handia izan zuen militar, konkistatzaile eta esploratzaile gisa -Buenos Aires hiriburu argentinarraren bigarren fundazioa egin zuen, lehenengoak kale egin ondoren- eta bere abenturazaletasuna omendu nahi izan dute monumentua jarrita.
Halaber, Maria Jesus Pozas Pozasek azpimarratu eta aldarrikatu du Juan de Garai urduñarra zela eta ez Losakoa. Irakasleak goraipatu du beti izan zela fidela Espainiako Korora, bere balio kristau eta zorrotzak, mestizajearen aldekoa zela -emakume indigena batekin semea izan eta aitortu zuen- eta gogoratu du bere abentura guztiak ez zituela egin bere mesederako. Izan ere, 1583. urtean Santa Fen indigenek hil ondoren -bera eta berarekin zeuden dozena bat soldadu-, txirotasunean geratu zen bere familia.
Satelitea
Satlantis enpresak ere parte hartzea izan du ekimenean, eurekin koordinatu baitute omenaldia. Izan ere, konpainiak Juan de Garai izeneko satelitea bidali du espaziora aurten eta, besteak beste, aldaketa klimatikoan eragiten duten elementuen kontrolerako baliatzen dute.
Satlantiseko buruek aipatu dute euren asmoa, Juan de Garai bezala, esplorazioa eta munduaren ezagutza zabaltzea dela.
Argentinatik agurrak
Iker Santocildes alkateak, bere hitzartzea egin ez ezik, Pablo Bereciartua Buenos Aireseko Garraio Ministroaren hitzak ere irakurri ditu. Bere familiaren erroak Azpeitian duen politikariak goraipatu du Juan de Garairen garrantzia hiriburaren historian.