Urduñako Udalak aitortza jaso zuen iragan ekainaren 18an Bilbao Bizkaia Ur Partzuergoak antolaturiko Lurra Sarien laugarren edizioan. Bilboko Campos Eliseos antzokian eginiko ekitaldiak jasangarritasunean eta ingurumenaren babesean lan egiten duten erakunde eta entitateak saritzea du xede.
Bide horretan, Agenda 21 saria jaso du Urduñako Udalak, urte luzez ingurumen-ekimenetan herritarren parte hartze aktiboa sustatzearen alde egindako lanagatik. Zehazki, berriki martxan jarritako Baso Erresilente proiektua goraipatu zuten sari-emate ekitaldian. 2022-2042 Onura Publikoko Mendia Antolatzeko Planaren barruan, Urduñako mendi publikoetan sute arriskuak eta karbono metaketak murrizteko asmoz egindako lana da hori, mendia modu jasangarrian kudeatu eta ustiatzeko aukera eskaintzen duena. Urduñako 109. mendian garatutako proiektua gainerako mendi publikoetara hedatzea da orain Udalaren erronka nagusia.
Iker Santocildes alkateak jaso zuen garaikurra Arantza Atutxa Ingurune Naturala eta Nekazaritza Sustatzeko Saileko Foru Diputatuaren eskutik. Santocildesek "harrotasuna eta orain arteko bidean lan egiten jarraitzeko gogoa" adierazi zituen bere hitzartzean. "Urduñak sari hau jasotzea eredugarria da; udalerri txikiak erreferente izan gaitezke jasangarritasunaren arloan", aldarrikatu zuen alkateak.
