Urduñako EH Bilduk oharra argitaratu du udal gobernu taldearen kudeaketarekin desadosadostasuna azaleratzeko. Izan ere, 2024ko aurrekontuen likidazioaren bidez, baieztatu dute Udalak ez duela gastu-araua bete, eta baimendutako muga % 15ean gainditu duela.
Aurrekontu Egonkortasunari buruzko 5/2013 Foru Araua urratzeak ondorio anitzak ekarri ditu tokiko erakundean. Alde batetik, "Udalak egokitzapen ekonomikorako plana onartu behar izan du, gero Bizkaiko Foru Aldundiak gainbegiratuko duena", adierazi du oposizioko taldeak.
Bi proiektu atzeratuta
Bestetik, koalizioak gaineratu du Udalak bi inbertsio eten behar izan dituela: "Ezin izan du Gernika plazako lokala erosi eta egokitu, eta ezin izan ditu gauzatu Kale Zaharreko bulegoak hobetzeko lanak; guztira, 330.000 euroko inbertsioa zen".
Horraz gain, EH Bilduren aburuz, 2026rako finantzaketa-gaitasuna ere arriskuan dago.
Beharrezkoak ez diren gastuak
Koalizioak EAJko udal taldearen kudeaketa eredua ere izan du jomugan eta jeltzaleei leporatu die zuhurtasun gutxirekin hartu izana erabakiak. "Beharrezkoak ez diren gastuetarako baliabideak bideratzen direnean, Udalak ezin du inbertitu benetan beharrezkoak diren kontuetan, hala nola kalitatezko zerbitzu publikoetan, garapen soziokulturalean, hiri-mantentzean, eta abar", adierazi du oposizioko koalizioak.
Horren aurrean, exijitu diote udal gobernu taldeari finantza-egonkortasuna eta inbertsio-ahalmena lehenbailehen berreskura ditzan eta xahutu ordez, gastua kontrolatu dezan.