Urduñako Maria Dolores Madaria eta Landatas auzoetako birgaitze integralerako lanak bisitatu ditu gaur goizean Denis Itxaso Etxebizitza eta Hiri Agendako sailburuak, Iker Santocildes alkatearekin batera. Hain zuzen ere, aipatutako hiriko bi auzoetan egiten ari diren esku-hartzeari esker, bertako etxebizitzen energia-eraginkortasuna eta irisgarritasuna hobetu dituzte.
Maria Dolores Madariaga eta Landatas auzoetako 10 atarik parte hartu dute hiri-berronartze lanetan, 130 etxebizitza orotara. Erakunde publikoek gaur aurreratu dutenez, birgaitze integrala azken fasera iritsi da, eta obrak urtea amaitu baino lehen bukatuko dira.
Maria Dolores Madariaga eta Landatas auzoetako 10 atarik parte hartu dute hiri-berronartze lanetan, 130 etxebizitza orotara.
Burututako lanei esker auzkoideek etxebizitzen energia eraginkortasunean eta irisgarritasunean "jauzia" egin dutela nabarmendu du Denis Itxaso sailburuak. Guztira hamar atarietako zortzitan egin dituzte irisgarritasun lanak, igogailuak jarrita edo instalazioaren kota jaitsita. Bestalde, etxebizitza guztietan egin dira energia hobetzeko lanak, isolamendu termikoa jarriz, besteak beste.
Baina irisgarritasunetik eta energia eraginkortasunetik haratago ere, bi auzoen "kohesio sozialean jauzia ere egin dela" aldarrikatu du Itxasok. Izan ere, espazio publikoaren berrurbanizazioa ere ekarri du proiektuak. Maria Dolores Madaria auzoan Antigua pasealekuaren berrurbanizazioa, galtzadaren eta espaloiaren arteko kotak berdintzea, telekomunikazio-lineak lurperatzea eta argiteria publikoa hobetzea ekarri du esku-hartzeak.
Guztira hamar atarietako zortzitan egin dituzte irisgarritasun lanak, igogailuak jarrita edo instalazioaren kota jaitsita.
Landatas auzoan, berriz, linea elektrikoak eta telekomunikazio-lineak lurperatuko dira, gas naturala auzora iritsiko da, trastelekuetako sarbideak hobetuko dira, argiteria eta altzari publikoak berrituko dira eta erabilera komunitarioko kanpo-espazio estali bat eraikiko da.
8,6 milioi euroko inbertsioa
Bi auzoak erabat birgaitzeko lanek 8,6 milioi euroko kostua izan dute orotara, eta proiektua Aiaraldea Eskualderako Berehalako Jarduera Planaren eta BERPIZTU Programaren barruan dago kokatuta.
Inbertsioaren zatirik handiena Europako Next Generation funtsetatik eratorria dela azaldu du Etxebizitza Sailburuak, 3,8 milioi euro baino gehiago. Eusko Jaurlaritzak 2,1 milioi euro jarri ditu, eta beste hainbeste jarri dute bi auzoetako bizilagunek.
Zehazki, irisgarritasuna eta energia eraginkortasuna hobetzeko lanak egin dituzten atarietan 21.327 euro jarri dute etxebizitza bakoitzeko.
Irisgarritasuna eta energia eraginkortasuna hobetzeko lanak egin dituzten atarietan 21.327 euro jarri dute etxebizitza bakoitzeko.
Energia-eraginkortasuna hobetzeko lanak soilik egin dituzten horietan, aldiz, 10.155 euro. Hori dela eta, bertako bizilagunen ahalegina balioan jarri nahi izan du Denis Itxasok. Iker Santocildesek bizilagunek obrek iraun bitartean erakutsitako "pazientzia eta inplikazioa" eskertu ditu ere.
Birgaitze-politikak balioan
Hedabideen aurrean azaldutakoaren arabera, Urduñako lur-zoru eraikigarria etxebizitza publikoak eraikitzeko asmoa du Udalak, "hiria adin guztietako herritarrentzat bizigarria izaten jarrai dezan".
Bisitatutako bi auzoetan egindako lanak ere goraipatu ditu Santocildesek: "Ehunka familiaren eguneroko bizitza hobetu eta gure auzoetako gizarte kohesioa indartzen duen eraldaketa sustatzen dute lan hauek".
Denis Itxasok Eusko Jaurlaritzaren etxebizitza birgaitze-politikak jarri ditu balioan. Sailburuak eskainitako datuen arabera, Euskal Autonomi Erkidegoak Europa hegoaldeko "etxebizitza-parkerik zaharrena du". Izan ere, 90.000 eraikin baino gehiago 1960ko hamarkadan baino lehenago eraikitakoak dira.
Bide horretan, atzo Eusko Legebiltzarrean aurkeztutako Etxebizitza Sailaren 2026rako aurrekontu proposamena defendatu du Itxasok Bertan jasotakoaren arabera, aurrekontu osoaren % 25 bideratu nahi ditu Jaurlaritzak birgaitze-politikak sustatzeko, 113,5 milioi euro inguru.