576 lagunek eman dute izena Urduñako Mendi Lasterketaren edizio berrian parte hartzeko. Goizeko bederatzietatik aurrera jendetzak hartu du hiria dortsalak jasotzeko eta beroketa ariketak egiteko. Frontoia izan da hasierako epizentroa, baina mugimendua Foru plazara joan da apurka-apurka.
Hala, 9:30ean atera dira 33 kilometroko eta 14 kilometroko ibilbideen lasterkariak, baina hori baino lehen Maderas de Llodioko grebalariak omendu nahi izan dituzte, babesa adierazteko. Ez da izan lasterketako aldarrikapen bakarra, plazan Palestinaren aldeko pankarta erraldoia eskegi baitute.
Gauzak horrela, 10:00etan abiatu dira txandakako probako kirolariak. Lasterkariak ikusteko eta animatzeko herritar mordoak jo du mendira eta lehen sailkatuak Foru plazara heldu direnean ere, jendetza zuten zain.
Sailkapenen aldetik, 33 kilometroko proban Joel Santamaria, Jon Durana eta Jon Betolaza izan dira irabazleak gizonezkoen kategorian. Aipatu beharra dago Iosu Isasi aiararra zazpigarrena izan dela. Emakumezkoen artean, Ainara Urrutiak, Sarah Ugartek eta Ainhoa Intxaustik osatu dute podiuma.
14 kilometroko norgehiagokan Mikel Larrinaga (Eskerrak Ahulak Garen taldekoa) izan da irabazlea gizonezkoen kategorian, Endika Martin bigarrena eta Asier Juanbeltz hirugarrena. Nabarmentzekoa da Lander Ruiz Martinez Gualdetxuko kidea zazpigarrena izan dela eta bere atzetik Anartz Puelles laudioarra sartu dela. Pedro Ibarrola hamargarren sailkatu da. Distantzia bereko lehen emakumezkoak Irune Lertxundi, Leire Etxabe eta Zuriñe Hoyos izan dira.
Txandakako diziplinan Koldo Etxebarri eta Unai Pagazaurtundua Aiaramendi eta Itxinape taldeetako kideek osatutako bikoteak lortu du garaipena. Aitor Gonzalez Mesa eta Ibon Mesa Perez izan dira bigarrenak eta hirugarrenak, aldiz, Unai Unzaga Larrazabal eta Xabier Arranz Moscoso.
Argazkiak: Aitor Aspuru eta Ainara Sanchez