Ostiral arratsalde berezia izan da Urduñako Herri Eskolako komunitatearentzat. Izan ere, haurrak ikastetxetik atera eta asteburua hasi denean, eskolako jolastokira biltzen hasi dira hainbat guraso eta ikasle ohi. Hitzordu berezia zuten, 30. urteurrenaren ospakizuna, hain zuzen ere.
Izan zirelako gara
Ekitaldia 17:30ak pasatxo hasi da, eta pantaila handian urte horietako guztietako irudiak proiektatu dituzte, eskolan modu batean zein bestean parte hartu dutenen testigantzez lagundurik. Ondoren hartu dute hitza Koldo Ulibarri eta Izaskun Biguri ikasle eta irakasle ohiak, hurrenez hurren.
Behin baino gehiagotan gogorarazi dute eraikinaren 30 urteak ari dira ospatzen, eta eskolaren historia bera lehenago abiatu zela, aduanako eraikinean. Publikoari eman nahi izan diote hitza, eta hainbat pasadizo kontatu dituzte, bertaratutakoen barre zein hunkidura keinuen artean. Esaterako, haurrek maite-maite duten Urdintxu maskota nola jaio zen kontatu du bere sortzaileak, Itziar Terrerosek.
Garelako izango dira
Orainaldira jauzi egin dute gero, eta egungo zuzendari Eunate Arbizuk hartu du hitza. Hunkituta, ezin izan die malkoei eutsi. Metodologia berriei buruz hitz batzuk esateko probestu du Arbizuk hitzartzea, baina batez ere, eskerrak eman nahi izan dizkie eskolan lehen urratsak emateko ahaleginak egin zituztenei, eta gaur egun eskolako bizitza posible egiten dutenei.
Ostean, Maialen Gineak, sortu berri den komunikazio lantaldearen izenean, ikastetxeko irudi korporatibo berria aurkeztu du, eta bere atzean dauden alderdiak balioan jartzen azaldu ditu logoaren zein bestelako euskarrien nondik norakoak.
Etorkizunari begira jarri dira azkenik, eta horretarako, IGEko bi kidek, Enara Llanok eta Ainhoa Valdesek hartu dute lehenbizi hitza, eta Irati Mendigurenen bertso batekin amaiera bikaina eman diote ekitaldiari.
Behin kiroldegitik kanpo, ikasgelak bisitatzeko aukera izan dute aspaldi eskolatik pasatzen ez ziren horiek, eta luntxa ere egon da askaltzeko. Kalejiran lotu dituzte ostean gaur egungo eskolaren eraikina eta eskola publikoa bere sorreran kokatuta egon zen hori, aduanarena.