31 eta 33 urteko bi gizon atxilotu ditu Ertzaintzak gaur goizean Urduñan, hamar bat ibilgailuetako kristalak apurtu eta ibilgailuen barruko objektuak lapurtzea egotzita.
Poliziak azaldu duenez, bizilagun batek eman du abisua goizeko seiak baino lehen. Nafarroa kaleko aparkaleku publikoan ikusi dituzte bi atxilotuak. "Poltsa ugari zeramatzaten, eta berriemaileari susmagarria iruditu zaio hori", azaldu du Ertzaintzak, "garaiz emandako abisu horri esker, inguruan patruilatzen ari ziren Ertzaintzako baliabideek lekuan bertan, leiho bat hautsita zuen ibilgailu baten ondoan, aurkitu ahal izan dituzte bi pertsona horiek. Ondoren, ingurua miatu dutenean, egiaztatu dute beste bederatzi ibilgailuk kalteak zituztela eta barrua erabat nahastuta zutela".
Zenbait autoren jabeekin jarri dira harremanetan agenteak, eta modu horretan ziurtatu ahal izan dute eurenak zirela "susmagarriek zeramatzaten hainbat poltsa eta objektu".
Horrez gain, dokumentazioa topatu diote atxilotuetako bati, "urte hasieran galdu zuela salatu zuen pertsona batena". Bestalde, "aparkalekuan aparkatuta zeuden ibilgailuetatik lapurtutako objektuak zituzten motxila eta poltsa gehiago" ere topatu dituzte, hiriko "tren-geltokiaren albo batean".
Hori guztia kontuan hartuta, bi gizonak atxilotu ditu Ertzaintzak, indarra erabiliz lapurreta egitea leporatuta. Poliziak jakinarazi duenez, gizonetako batek polizia-aurrekari ugari ditu antzeko ekintzengatik.
Ertzaintzak zazpi salaketa ofizial jaso ditu gaur goizeko gertakariengatik, eta hainbat objektu itzuli dizkiete dagoeneko euren jabeei.