Hainbat ekintza egin dituzte Ernaiko Aiaraldeko kideek Espainiako Konstituzioaren Egunaren testuinguruan, sare sozialetan zabaldutako bideo batean aditzera eman dutenez. Hainbat margoketa egin dituzte eskualdean, eta Urduñako Udaletxeko balkoira igo dira, Espainiako bandera kentzeko.
Horrez gain, Francoren garaiko plaka bat ere kendu dute Amurrioko etxebizitza bloke baten paretatik. Plaka horiek sinbologia faxista dute (Falangearen ikurraren aldaera bat) eta oso ugariak dira Espainiako Estatu osoan, Etxebizitza Ministerio frankistak garaiko "babestutako etxebizitzetan" jartzen baitzituen.
"Estatu espainiarrak Euskal Herriarekiko gauzatzen duen zapalkuntza eta ukazioa salatzea" izan da ekimenaren helburua, Ernaiko kideen hitzetan. Hala aldarrikatu dute sare sozialen bidez: "Sinbolo espainolistek ez dute tokirik gure herrietan. Guk argi dugu: Euskal Herriak independentzia behar du. Gure eskubideak urratzen jarraitzen duten bitartean, guk erantzuten jarraituko dugu".
Ver esta publicación en Instagram