Atxiloketa bat egin du Ertzaintzak gaur gauean, 03:30ak aldera dei bat jaso ondoren. Poliziak zabaldu duenez, La Antigua auzuneko etxebizitza baten jabea jarri da harremanetan eurekin, jakinarazteko etxean ez egon arren, bideokamara bitartez detektatu zuela ezezagun bat bertan.
Laudioko Ertzain-etxeak patruila bidali du tokira eta baieztatu dute etxeko leiho bat apurtuta zegoela. Gauzak horrela, barruan sartu dira eta 21 urteko gizonezkoa topatu dute ezkutatuta.
Susmagarriak poltsikoetan etxean lapurtutako hainbat gauza zeramatzan, besteak beste, erloju bat eta urrezko lepoko bat. Gainera, ertzainek beste bi pertsonaren izenean zeuden hainbat agiri eta bankuko txartel bat ere aurkitu dizkiote, bai eta 20 euro zituen diru-zorro bat eta bi boligrafo ere.
Agenteek egiaztatu dutenez, objektu horiek aldameneko garajekoak ziren, eremu bereko beste etxebizitza batekin komunikatuta dagoena, eta bart gauean bertan ere lapurreta jasan zuena. Eraikin hori eta bertan aparkatutako ibilgailu bat ere nahastuta zeuden.
Froga horiekin, Ertzaintzak bi lapurreta egitea leporatu dio gazteari eta epaitegira eramango dute akusazio horrekin.