Maria Dueñasen Sira nobela arrakastatsuan oinarrituta, izen bereko telesaila filmatuko dute egunotan Urduñan. Buendía Estudios Bizkaia etxea dago ikus-entzunezkoaren ekoizpenaren atzean, eta Bizkaian ez ezik, Madrilen eta Marokon ere grabatuko dituzte lokalizazioak.
Azaroan dagoeneko filmaketak egin zituzten Urduñan. Ostegunean, hilaren 18an, aldizkako trafiko mozketak egongo dira Zaharra kalean, 13:30etik 18:30era bitarte.
'El tiempo entre costuras' fenomenoa
Maria Dueñasen El tiempo entre costuras eleberriaren jarraipena da Sira. Lehenengo liburuan, Gerra Zibila hasi aurretik, Sira Quiroga jostun gazteak Madril utzi eta Tangerrera egiten du alde bere bizitzako amodioa bizitzeko asmoz. Bertan dagoela, eta aurreikusi zezakeenaren kontra, hankaz gora jartzen zaio mundua.
2013 eta 2014an egin zuen salto istorioak paperetik telebistara, eta Adriana Ugartek antzeztu zuen protagonistaren papera. Telesaila oso arrakasta handikoa izan zen, bai kritikaren eta baita audientziaren aldetik ere, eta 70 herrialde baino gehiagora zabaldu zuten.
Sekuelan ere, Ugarte izango da pertsonaia nagusia. Oraingoan, Sirak gerraosteko munduari egin beharko dio aurre, eta bizirik irauteko ahaleginak egin beharko ditu. Jerusalemdik Londresera edo Madrilera, protagonista sekretuen eta misioen sare batean murgilduko da, inteligentzia eta ausardia beharko dituzten erronketan.
Adriana Ugarterekin batera, beste aktore hauek ere ikusi ahalko ditugu telesailean, hala nola Peter Vives, Rubén Cortada, Carlos Santos, Carlos Olalla eta Francesc Garrido.