Gorbeialdea Landa Garapena erakundeak eta Bizkaiko Foru Aldundiak baso abeltzaintza sustatu nahi dute sei udalerritan: Diman, Areatzan, Orozkon, Zeberion, Zeanurin eta Urduñan. Zehazki, Aiaraldeko hirian garatutako eredua hartuko dute erreferentetzat eta mendi publikoetara zabalduko dute.
Egitasmoaren helburua da baso-eremuetan abeltzaintza tradizionala lehengoratzea, mendi publikoen egoera hobetzea eta klima-aldaketaren aurkako borroka indartzea.
Abeltzaintza eredu horrek zuhaitzak, sastrakak, larreak eta abereen presentzia kontrolatua uztartzen ditu. Eredu estentsiboa da eta bioaniztasuna kontserbatzen, sute-arriskua murrizten, larreak birsortzen eta lurzoruek karbonoa finkatzeko duten gaitasuna handitzen laguntzen du. Horregatik, abeltzaintza modalitate hau klima-aldaketa arintzeko tresna garrantzitsutzat jotzen dute.
Gainera, abeltzaintza tradizionalari estu lotutako ondare kulturala mantentzea ahalbidetzen du.
Udalerri bakoitzean, lanen diseinua eta programazioa abiadura ezberdinean doa. Izan ere, aipatu bezala, Urduñan duela urteak abiatu zuten praktika hau. Esku-hartzearen barruan sartzen dira landa-lanak, materialen hornidura, obraren koordinazioa eta zuzendaritza, abeltzaintzako elkarteekiko koordinazioa eta Neikerrek esku-hartzeen aurretik eta ondoren egindako ebaluazioa.