Urduñako Jai-Alai Pilota Eskolak txapelduna dauka bere jokalarien artean. Izan ere, larunbatean Urdax Garriga 12 urteko gaztea Bizkaiko buruz buruko finalean gailendu zen Gaztetxoak kategorian eta B baxua mailan.
Finala Zaratamon jokatu zuten urduñarrak eta Izan Fontalba ortuellarrak. Lehia oso bizia izan zen eta lehen seta aiaraldearrarentzat izan zen, 4-10. Bigarrenean, ordea, Danok Lagunak klubeko kideak emaitza hobeak lortu zituen, 10-6ko markagailuarekin amaituta. Azken set erabakigarrian Garrigak nagusitasuna erakutsi eta 1-5 irabazi zuen.
Urduñako Jai-Alai Pilota Eskola oso pozik dago lorpenarekin eta atzo bertan omenaldi txikia egin zioten entrenamendua hasi baino lehen.
Klubak azpimarratu du gazteak urteak daramatzala pilota eskolan eta Bizkaiko binakako txapelketan ere parte hartzen duela. Hain zuzen, bigarren fasea berehala hasiko da. Horrez gain, datorren asteburuan Herriarteko Txapelketa jokatuko da eta Gallartaren kontra lehiatuko da klub osoa.
Eneko Goenaga
Talde urduñarrak goraipatu nahi izan du Eneko Goenagaren parte hartzea Gaztetxoak kategorian eta B altua mailan. Izan ere, nahiz eta ez irabazi, finalerdietara heltzea lortu zuen.