Larunbat hunkigarria bizi izan zuten Edu del Cerroren senideek eta lagunek Belatz Gorri tabernan. Izan ere, kontzertua egin zuten bera oroitzeko eta poztasuna eta malkoak nahastu zituzten bizitzako oztopoei erreparatzen ez zion urduñarra gogoratzen.
Berez, Edu del Cerro ezaguna zen hirian arrazoi anintzengatik. Mariako Konpainian ikasi zuen eta hainbat hiritarrekin izan zuen harremana, baina ospetsuagoa izan zen STOP taldeko kidea izateagatik.
Musika bandak punka eta rocka jorratu zituen eta hainbat kontzertu eskaini zituen eskualdean 1993 eta 1997 urteen artean. Bere anaia Julenek gogoratu ditu zuzeneko bereziak: "Amurrioko San Anton plazan jo zutenean 1994ko Amurrioko jaietan. Amurrion ere jo zuten institutuko ikasbidaia finantzatzeko. Urduñan Amnesia taberna zen euren leku berezia, birritan jo zuten, eta Gaztetxean ere (merkatuan zegoena), igerilekuetan...".
Dena den, Julenek uste du STOP taldearen alderik interesgarriena izan zela jende ugari animatu zela euren eredua jarraitzera eta talde propioa sortzera. Erreferente izan ziren.
Larunbatean bere taldeko lagunak berriro batu ziren eta Eduren hutsunea betetzeko Julenek eurak hartu zuen bere anaia handiaren baxua. "Nahiz eta bera bezain ondo ez jo, hunkigarria izan zen niretzat bere musika tresna hartzea", aipatu du Julenek.
Lagun ona
Baina bere anaia ez zen omenaldian parte hartu zuen bakarra. Lehengusu eta lehengusinak, lagunak eta taldekideak ere bildu ziren Belatz Gorrin, barre eta negar egiteko eta azpimarratzeko Edu oso adiskide ona zela, beti zegoelako laguntzeko prest.
Jakina, Julenek ez du ahaztu nahi izan bere semeek argitzen zutela bere begirada, lehoi baten izaera zuela eta bete zituen 49 urteak ondo aprobetxatu zituela: "Aspaldi zegoen gaixorik, baina oztopo guztiak atzean uzteko gogoa zuen, bizitzeko. Beti egin nahi zuen aurrera eta hainbat proiektu zituen".
Eduren itzala luzea izango bada, larunbateko kontzertuak utzitakoa biltzen ari dira orain, hemen.