Iragan larunbat gauean (martxoaren 1ean) erasoa jasan zuten Urduñako bi neba-arrebek. Edu del Cerroren omenezko kontzertuen ostean jaso zen gertakaria, bi senideak Gran Via kaleko etxeko atarira sartzear ziren unean. "Eraso oso larria" izan zela azaldu diote erasoa jasan zuten herritarren gertukoek Aiaraldea Komunikabideari. Salaketa jarri eta epaiketa gauzatu ahal izateko, ordea, lekukoen beharra zuten.
Leukoak biltzeko ahaleginean WhatsApp mezua zabaldu dute gaur goizean. Jipoiaren inguruko edozein informazio bildu nahi zian dute senideek. Helbide elektroniko berezi bat ere jarri dute martxan. Bolo-bolo ibili da mezua, eta azkenean aurkitu dituzte bilatzen zituzten lekukoak.
Izan ere, Belatz Gorri taberna kanpoan zegoen neska talde bat identifikatzea izan da senideen helburu nagusia. Neska taldea ez zen Urduñakoa baina mezua zabaldu bezain laster lortu dute eurekin harremanetan jartzea.
Kasua epaitegian
Jipoia jaso zuten bi herritarren senideek asko eskertu dute mezuak izan duen zabalpena eta jendearen inplikazioa. Mezua gehiago ez zabaltzeko eskaera ere luzatu dute, dagoeneko lekukoak aurkitu dituztelako. Bildutako informazio guztiarekin epaitegira joko dute orain, eta erasotzaileen aurkako salaketa jarriko dute.