Larruazabalgo historia hobeto ezagutzeko aukera emango du Adratan elkarteak igandean Mendeikako elizan 11:00etan. Izan ere, Korozen mendian dagoen Jesusen Bihotz Sakratua nola eraiki zen azalduko dute.
Eliseo Gutierrez hartuko du horren ardura, azken urteetan ikertu baitu monumentu horren nondik norakoak. Antza, ideia jesuitena izan zen, baina Belandia, Mendeika eta Lendoñogoiti eta Lendoñobeitiko herritarrek hartu zuten ardura osoa. 9.000 pezeta jarri zuen herri bakoitzak eta gero adra (edo auzolan) bitartez eraiki zuten.
Gutierrezek goraipatu nahi du bertokoek egin zuten ahalegin handia 1954an. "Nazionalkatolizismoak botere handia zuen garai horretan, urtebeteko aurrekontua eta euren lana jarri behar izan baitzuten".
Gertakari osoa argitzeko fitxategi ezberdinak arakatu eta ahozko kontakizunak batu ditu Gutierrezek.
Historiako pasarte gehiago
Elizan hitzaldi txikia eman ondoren, Korozen mendira igoko dira parte-hartzaileak, baina Larruazabalgo beste toki batzuk ere bisitatuko dituzte, herrixkan horien iragana hobeto ezagutzeko.
Esaterako 1936ko lubakiak erakutsiko dituzte, baita herritarrak historikoki bildu diren zelaia.