Udal-igerilekuen irekiera data aurreratzea eskatu dio Urduñako EH Bilduk tokiko gobernuari, "egungo errealitate klimatikora egokitzeko eta herritarren beharrei erantzun hobea emateko". Zehazki, asteburu honetan, maiatzaren azkenengoan, irekitzea proposatu zioten Udalari apirilean, horretarako eskaera formala tramitatuta.
Bide horretan, koalizioak kritikatu du gobernu-taldeak "jada berandu dela" adierazi izanak. Izan ere, haien ustez, "proposamena egin zen unean beharrezko neurriak martxan jarri izan balira, posible izango zen igerilekuak lehenago irekitzea".
Jende pilaketak hobeto kudeatzeko hainbat neurri ere proposatu ditu EH Bilduk. Alde batetik, jende gehien espero den egunetan "txango antolatuen kopurua mugatzea". Bestalde, "eguneko sarreraren prezioa berrikustea, saturazioa kontrolatzen laguntzeko". Eta, azkenik, udal-teknikariek, enpresa kudeatzaileak eta ordezkari politikoek "jarraipen-batzorde bat sortzea, instalazioen funtzionamendu egokia eta uraren kalitatea bermatzeko".
"Zentzuzkoak eta egingarriak" dira neurri horiek koalizio subiranistako kideentzat eta adierazi dute ez dutela "inbertsio handirik edo egiturazko aldaketarik eskatzen", baizik eta "borondate politikoa eta egokitzeko gaitasuna".