Orduener kooperatibak ez du etenik izan bere jardueran eta Herri Eskolan (100 Kw), frontoian (47 kw) eta Arbietoko futbol zelaian (25 kw) instalazio fotovoltaikoak ezarri eta gero, bi proiektu berri lantzen ari da. Alde batetik, Pinbak enpresarekin hitzarmena sinatu nahi dute uda ostean bere pabilioiko teilatua erabili ahal izateko azpiegitura fotovoltaikoa edo hibridoa (aerosorgailu txiki batekin) jarri eta, modu horretan, 100 Kw sortu ahal izateko.
Bestetik, Europan lortutako dirulaguntza baten bidez, tamaina ertaineko aerosorgailua eremu industrialean instalatzeko aukera aztertzen ari dira. 500 megawatio sortzea izango lirateke helburua eta jadanik hondatuta dagoen tokia hautatu dute. Hori bai, momentuz, egindako neurketek eta teknologiek ez dute hori ahalbidetzen eta probak egiten ari dira aukera teknikoa egongo ote den argitzeko. Izan ere, finantzazioa eskuratzeko bidea izango lukete.
Bazkide eta energia gehiago
Orduener apurka-apurka aurrera egiten ari da bere planteamenduan: urduñar orori bere kontsumo elektrikoaren energia berriztagarriaren kopurua %30 edo %40ra igotzea.
Kooperatiban bazkidetu beharra dago horretarako, 10 euroko kuota eta kontsumoaren araberako ekarpen boluntarioa eginda.
Bazkidetzari edota energiari lotutako edozein zalantza argitzeko, ekimenak badu bulegoa Foru plazan eta aldez aurretik hitzordua lotu beharra dago 649 200 421 telefonoan.
Elikadura burujabetza ere
Proiektuak energia askitasuna lantzen duen moduan, elikadura burujabetzaren bidea ere hartu nahi du. Horretarako, hurrengo urtean tokiko nekazaritza eta abeltzaintzan oinarritutako kontsumo eredua bultzatu nahi du.