EH Bilduk prentsa oharra zabaldu du kritikatzeko, bere ustez, udal gobernu taldeak ez duela kudeaketa egokirik egin animalien ongizatearen esparruan. Koalizioak adierazi du EAJk animalien aterpea 2024an itxi zuenetik ez duela bestelako proposamenik egin arlo horretan.
Gauzak horrela, oposizioko taldeak salatu du ugaritu egin dela abandonatutako katuen kopurua, animali horiek hilik edo zaurituta agertu direla kalean, eta deskontrola dagoela kolonietan.
Horren aurrean, premiazko kudeaketa exijitu diote udalburuari. Horrez gain, EH Bilduk iragarri du animalien babesa, ongizatea eta edukitze arduratsua arautzen dituen udal-ordenantzaren zirriborroa aurkeztuko duela, udal bakoitzaren eskumena baita animalia horiek antolatu eta kudeatzea. Ordenantza horrek, gainera, aukera emango du Animalien Ongizateari buruzko Legea betetzen dela bermatzeko.
Azkenik, koalizioak katu kolonien zaintzaileei eskerrak eman dizkiete hartu duten konpromisoagatik.
Gogoratu beharra dago 2020tik 2024ra bitartean El refugio de los Sabios aterpea egon zela funtzionamenduan Urduñan. Lau urte horietan 216 animali hartu zituen bere gain babeslekuak, adopzioak bideratzeko zein horien jarraipenak egiteko. Etxerik gabe geratutako edo galdutako animaliei edota tratu txarrak pairatu izan zituztenei tokia egiten zien aterpeak, jabe berrien esku utzi arte.
Berez, tokia ez zen soilik txakur edota katuentzako eremua. Izan ere, txerriak, dortokak edota astoak ere artatu zituzten.