Urduñako Mendi Martxaren XXI. edizioa antolatuko du igande honetan Txarlazo Mendi Taldeak. Gaur egin dute martxaren aurkezpena eta bertan izan dira klubeko ordezkariak, Iker Santocildes alkatea eta Uxue Mendibil Kultura eta Kirol zinegotzia.
Martxak bi hamarkadako ibilbidea bete izana goraipatu du Mendibilek, eta "hiriko egutegian markatutako hitzordua" dela azpimarratu du. Udaletik eskerrak eman nahi dizkiote "Txarlazo Mendi Taldeari jarduera hau antolatzeko egiten duen lan guztiagatik".
"Gure bailara gertutik ezagutzeko aukera paregabea eskaintzen du mendi martxak" goraipatu du bere aldetik Juan Angel Velez Txarlazo Mendi Taldeko kideak. Luzera desberdinetako hiru ibilbide prestatu dituzte eta, Urduñako lurrak ez ezik, Burgoseko zein Kuartangoko mendiak ere zeharkatuko dituzte. Izen emateak egunean bertan egingo dituzte, 7:30etatik aurrera Foru plazan
Mendiaren hilabetea
Mendi martxak bat egingo du Urduñako Udalak eta Txarlazo Mendi Taldeak elkarlanean antolatutako "Mendiaren Hilabetearekin". Egitasmo honekin mendizaletasuna eta honen historia eta kultura herritarrengana gerturatzea dute helburu. Programazio horren barruan 60 urte baino gehiagoko historia duen hiriko mendi taldeari buruzko argazki-erakusketa atondu dute Alondegian, urriaren 18ra arte egongo dena ikusgai.
Horrekin batera, hitzaldi zikloa ere prestatu dute. Gaur bertan Gorbeiako gurutzeari buruzkoa eskainiko du Iñaki Garcia Uribek. Urriaren 14an, aldiz, Gorobeleko abeltzaintzari lotutako txabola eta "txaulak" izango ditu hizpide Juan Hidalgo historialariak.