Apirilaren 27an hasiko dira Aiarako jaiak. Aurten, gainera, arreta berezia jarri diete berdintasunari, euskarari eta ingurumenari; eta festak hobetzeko gomendioak eta neurriak ezagutarazi dituzte, bost guztira. Aurrenekoa Aiara berdintasunaren alde” zapi morea jartzea da, parekidetasuna bultzatzeko. “Euskaraz hitz egin eta ahalbidetu besteek ere egin dezaten”, dio bigarrenak. Hain zuzen, lehen hitza euskaraz egitera konprometitu dira festetako kideak. Bestalde, hondakinak eta soberakinak birziklatuko dituzte, horretarako materiala eta guneak eskura jarrita. Hori dela eta, festez gozatzera hurbiltzen direnei arduratsuak izateko deia luzatu diete, baita erabiltzen dituzten ontziak jasotzekoa ere.
Baloreak sustatzeko modu berriak
Aipatutako baloreak sustatze aldera, hainbat material sortu dute. Batetik, zapi moreak; 0.50 euroren truke egongo dira eskura txosnetan. Horrez gain, Prontxik, hots, Aiarako jaietako maskotak, betaurreko moreak eramango ditu jantzita. Antolakuntzari dagokionez, estereotipoak eta ohiko rolak ekiditeko lan banaketa modua berritu dute. Etxaurren Ikastolako andereñoak izango dira aurtengo pregoilariak. Aurreratu dutenez, festen hasiera ekitaldian emakumeek herriko historian egindako lana goraipatuko dute. Halaber, komunikazio euskarrietan eta musika eskaintzan euskara indartzen saiatu dira. Ingurua zaintzeko, aldiz, bazkarietan plater eta mahai-tresnak berrerabilgarriak erabiltzeko deia luzatu dute, baita tokiko ekoizleen produktuak kontsumitzekoa ere. Ildo beretik, zabor pilaketa saiheste aldera, edalontziak jasotzeko ahalegina eskatu dute