Aiarako EH Bilduk larunbatean Luiaondon burututako ekitaldia kritikatu du. Prentsa oharrean azaldu dutenez, udaleko azken kultura batzordean galdetu zuten Malatu aretxaren historia zabaltzeko ekitaldiaren zergatia, ez zelako hura antolatzeko udalbatzarekin kontatu. Koalizio abertzaleak salatu duenez, alde bakarreko erabakia izan da: "Ekitaldia iragartzeko kartelak jarri baino ordu batzuk lehenago jaso genuen telefono deia. Formalki, EH Bilduko lau zinegotziok ez dugu gonbidapenik jaso".
EH Bildukoen esanetan, abenduko kultur batzordean ez zen afera aipatu, ezta urtarrilekoan ere, "gaiaz hitz egin zuten azalpenak eskatu genituenean". Azpimarratu dutenez, kultur ondarea nabarmendu eta zabaltzeko argibide taulak jartzea "behin baino gehiagotan" eskatu du EH Bilduk aurrekontuetan, bai biztanleek eta baita bisitariek ezagutu eta gozatzeko. "Oraingo honetan gobernu taldeak antolatu duen ekitaldiak agintarien presentzia zabala izan du, baina aiararrena urria izan da. Gehiago zuen hauteskundeen kutsu alderdikoiaren itxura, benetako ekitaldi kulturalarena baino. Gainera, aiarar guztien diruz ordainduta", erantsi dute.
Zentzu horretan, elkarteekin eta udal batzordeekin ondarea balioan jartzeko proiektu herrikoia garatzeko aukera galdu dela pentsatzen dute EH Bildukoek, "ekitaldi alderdikoiagoa garatu dute herrikoia baino". Maite Alonso Luiaondoko Batzar Administratiboko lehendakariak, Gentza Alamillo Aiarako alkateak eta Ramiro Gonzalez Vicente Arabako Diputatuak hartu zuten parte ekitaldian.
Gentza Alamillo alkateak Aiaraldea hedabideari adierazi dionez, osoko bilkuran azaldu zituzten ekimenaren arrazoiak eta ez dituzte adierazpen gehiago egingo.
