.JPG)
Krisi sozioekonomikoari aurre egiteko neurriak “modu ulergarrian” jasotzea eskatu du Aiarako EH Bilduk, herritarrengana hurbiltzeko helburuarekin.
“Espainiako Gobernua, Eusko Jaurlaritza eta Foru Aldundia laguntza ildoak iragartzen ari dira, eta horiek bilduma batean biltzea planteatu du oposizioko taldeak, hainbat euskarritan argitaratuta, “ahalik eta herritar gehienei zabaltzeko”.
EH Bilduk, informazioa bideratzeko orduan, modu eskematiko, grafiko eta zehatz baten aldeko apustua egin nahi du, ulergarritasuna bermatzeko. Saraube udal aldizkaria euskarrietako bat izan ahalko litzatekeela ere aipatu dute taldeko kideek prentsa ohar baten bidez.
Dagoeneko lanean
Aiarako Udalak, bere aldetik, ildo horretan lanean dagoela nabarmendu du. "Horretan lanean gabiltza, eta ez EH Bilduk esan duelako", azaldu du Iñigo Pinedok. Alkateordearen arabera, ez du zentzurik une honetan txosten bat egiteak, "dekretuak egun batetik bestera ateratzen ari direlako eta egun batean dekretu batek esaten duena hurrengo egunean beste dekretu batek bertan behera utzi dezakeelako".
Gauzak hala, ezarriko diren laguntzak finkatu arte itxaron nahi du udalak, ondoren laguntza horien analisia egin eta bide-orria diseinatzeko. Orduan baloratuko dute tokiko erakundeak zer laguntza jarri ahalko dituen martxan, "Aldundiak edota Eusko Jaurlaritzak eskainiko dituenak ikusita, horiekiko osagarriak izan daitezen".