Aiarako EH Bilduko taldeak dei egin dio udalari neurri bateratuak hartzeko Etxaurren Ikastolako ordezkariekin eta bertako guraso elkartearekin.
Koalizioaren ustez, Eusko Jaurlaritzak prebentzio eta segurtasun neurri ugari utzi ditu ikastetxeen esku. Ondorioz, Aiarako Udalak Etxaurren Ikastola laguntzeko alderdi guztiek parte har dezaketela pentsatzen dute, "ikasturtea ahalik eta osasun-segurtasun handienarekin has dadin (kutsatze berriak saihestuz)". Horretarako, balizko konfinamenduen aurrean, Internet konexioa bermatzea eskatu dute (bai baliabide gutxiago dituzten familientzat zein gure udalerriko hainbat eremutan seinale-arazoak dituztenentzat) eta pandemiaren gorabeherek familia eta lan kontziliazioa ez zigortzea.
Horrela EH Bilduk proposatzen du erabaki esparru bateratua sortzea Etxaurren Ikastolako zuzendaritzarekin, guraso elkartearekin eta udalarekin: "Udalak zein neurri har ditzakeen adosteko, ikasturtea ahalik eta baldintza onenetan has dadin ikasleentzat, familientzat eta ikastetxean lan egiten duten irakasle eta irakasle ez diren profesionalentzat. Gure ustez, premiazkoa da egoera mahai gainean jartzea, ezarritako neurriek gure ikastetxeari nola eragiten dioten ikustea, eta guztion artean lantzea hainbat egoeretarako irtenbideak aktibatzeko, dela espazioen beharrari heltzeko, dela garbiketa eta desinfekzioa indartzeko…".