Ertzaintzak uste du argitu dituela martxoan Aiaran gertatutako hainbat lapurreta. Hain zuzen, maiatzaren 6an Barakaldon bi lagun atxilotu zituen horregatik eta horietako batek, 43 urtekoak, espetxean amaitu du. Pertsona horrek, aurrekariak izateaz gain, beste kartzelaratze agindu bat zuen bere gain.
Ikerketa
Apirilaren erdialdean Laudioko Ertzain-etxeak identifikatu zuen atxilotutako gizona eta berrestu zuen aurrekariak zituela. Horren ostean hasi ziren bera ikertzen eta poliziak konturatu ziren Bilboko salerosketako denda batean saltzen zituela lapurtutako objektuak.
Maiatzaren 6an agenteak gizonaren Barakaldoko etxean sartu ziren, eta ondarearen kontrako delituekin zerikusia zuten froga ugari aurkitu zituzten bertan zein bere autoan. Halaber, 48 urteko beste inplikatu bat harrapatu zuen poliziak.
Lapurretak etxeetan eta Zuhatzako elizan
20 lapurreta inguru leporatzen dizkiete susmagarriei. Horietako batzuen berri eman zuen Aiaraldea Hedabideak martxoan, baina gehiago jazo ziren, bai Aiaran bertan zein kanpoko udalerritan (Gernika, Galdakao eta Elgoibar).
Delitu gehienak familia bakarreko etxetan eta baserritan izan ziren, baina pisutan, tresnak gordetzeko etxoletan eta Zuhatzako elizan ere gertatu ziren. Hain zuzen, balio artistikoa eta kulturala duten objektu liturgikoak lapurtu zituzten han.
Edonola ere, atxilotuek material hauek bilatzen zituzten: zilarrezko, kobrezko eta brontzezko objektuak (esaterako, kafe-jokoak), erremintak (motozerrak, sasiak garbitzeko makinak…), maletak, koadroak edota argazki-makinak.
Objektuak berreskuratzeko prozesua
Ertzaintzak argazki bilduma osatu du lapurretak pairatu dituztenek identifikatu ditzaten atzemandako gauzak. Laudioko Ertzain Etxera jo dezakete interesdunek berreskuratzeko.