Aiala Txirrindulari Elkarteko kideek asteburu oso bizia izan dute. Hasteko, larunbatean Jose Pereda Memoriala irabazi zuten Colindresen. Banakako kategorian Tamirat Navarrok lortu zuen nagusitzea lasterketan. Ihesaldi saiakera ugari egon ostean, Navarrok, Gorka Torresek eta Iurdan Garciak utzi zuten atzean tropela, baina aiararrarentzat izan zen garaipena sprintean.
Proba hori gogorra dela azaldu du taldeak: "luzea da eta bi mendikate igaro behar dira, bigarrena helmugatik 15 kilometrora". Gainera, Hego Euskal Herriko zein Kantabria, Madril, Asturias, Gaztela Leon eta Aragoiko txirrindulariek parte hartu zuten. Halaber, taldekako sailkapenean Luyando Opticasekoak izan ziren lehenengoak.
Podium gehiago
Aiarako taldean ibilitako beste txirrindulari batzuek ere asteburu ona izan dute. Esaterako, Asier Berazak podiuma zapaldu zuen Barakaldon mendi txirrindulako Green Series lasterketan, 3. sailkatuta. Horrez gain, Iñaki Guaresti 4. izan zen Tolosan eta Julen Garciak postu bera eskuratu zuen Berrituan. 'Abiatzen' txapelketaren barruan daude bi probak, Elite eta Sub-23 kategorietan.
Euskadiko Selekzioak hautatuak
Bai Tamirat Navarro zein Asier Beraza aukeratuak izan dira Espainiako Txapelketan aritzeko, errepideko eta mendi txirrindulako diziplinetan, hurrenez hurren.