"Asteburu oso bizia" izan da Aiara Txirrindularitza Elkartearentzat. Hala adierazi dute, behintzat, sare sozialetan. Izan ere, batetik, Asier Berazak Espainiako MTB Kopako lasterketa izan zuen Sabiñanigon: "16. postuan sailkatu zen. Arespalditzarrak hobetzen jarraitzen du, gurpil lodiko espezialitatean hazten". Beraza ez zen izan, ordea, hitzordu garrantzitsuak izan zituen bakarra: larunbatean Estibalizeko erlojupekoa jokatu zen, eta Aiara Txirrindularitza Elkarteko kide ugari bertaratu ziren. Emaitza bikainekin itzuli ziren, gainera: "Oso ondo aritu ziren gure txirrindulari guztiak, lehenbiziko 10 sailkatuen artean gutako 4 zeuden". Azpimarratzekoa da, zentzu horretan, Iñigo Uriaren bigarren postua: lasterketako garaileak segundo bakarreko aldea soilik atera zion.
Iñigo Uriak bigarren postua lortu zuen Estibalizko erlojupekoan; eta Oier Colmenero eta Harri Peskier izan ziren hurrenez hurren, Amurrioko txirrindularitza probako garaileak
Igandean, aldiz, Amurrioko Sari Nagusia izan zuten esku artean, Arabako Txapelketarako puntuagarria zena. "Gazteak zoragarri aritu ziren, oso lasterketa ona egin zuten. Ihesaldi goiztiarra harrapatu zuten, eta gero, 'ihesaldiaren ihesaldia' probokatu zuten, Txentek esango lukeen bezala". Gauzak hala, helmugara ihesaldiko 5 txirrindulariak iritsi ziren, eta lehenbiziko postuak Aiara Txirrindularitza Elkartearentzat izan ziren: Oier Colmenero izan zen azkarrena, eta Harri Peskierrek lortu zuen bigarren postua. Ondorioz, Oier Colmenero da Arabako Txapeldun berria, eta Harri Peskierrek Arabar Challengeko lider jarraitzen du.
