Nolakoa izan da aurtengo jaiak antolatzeko prozesua?
Apirilean hasi ginen hitz egiten, erabakitzeko zer egingo genuen aurten, normaltasunera itzultzen ari ginen eta, gutxi gorabehera. Bagenituen gogoak jaiak berriro antolatzeko.
Gauzak horrela, ospakizunak antolatzen ditugunok, hamaika lagun inguruk, egin genuen bilera eta festa uztailaren 17an eta 18an egitea adostu genuen, beti bezala.
Berez, maiatzean hasi ginen ekintzak zehazten eta osasun egoeraren ondorioz, zenbait jarduera ez egitea erabaki genuen. Adibidez, mus txapelketa ez dugu egingo. Esan bezala, maiatzean positiboak ugaritzen ari ziren, eta horrela ekidin dugu jendea elkartzea leku itxietan. Finean, aire librean egingo dugu egitarau osoa.
Aurtengo egitarautik zer nabarmenduko zenuke?
Beti bezala, mendi ibilaldia eta igandeko odoloste jana. Hori da aipagarriena. Izan ere, igandean ospakizunak egon arren, antolatzaileok ere lan egin behar dugu eta eredu sinpleagoa proposatu dugu, DJ batekin arratsalde eta gau parteko erromeria gozatzeko.
Mendi ibilaldiak zein leku zeharkatuko ditu?
Bederatzi kilometroko ibilbidea izango da. Eskolatik abiatuko gara, han jartzen dugu txosna ere. Lastratik igoko gara Oletara eta 'Korapiloen iturrira' joko dugu, gero jaisteko. Ibilbide zirkularra egingo dugu.
Salmantonen nabaritu duzue jairik gabe egon zaretela?
Bai, lehenengo urtea pena handia izan zen, ezin baikinen batu. Jai hauek oso familia girokoak dira eta etxeetan elkartu ez izanak sentsazio mikatza utzi zigun.
Iaz aukera izan genuen ospatzeko, baina bakoitza bere etxean bere senide gertukoenekin.
Espero dugu jendea animatzea apurka-apurka normaltasunera itzultzen eta galdutakoa berreskuratzen.
Zentzu horretan, uste dut igandean errazagoa dela jendea etortzea. Izan ere, Zuhatzako Jai Batzordearekin koordinatzen gara egitarauek bat egin ez dezaten.