15 urte baino ez izan arren, Sarai Gandarias Gordonek debuta egin zuen larunbatean Euskal Ligan Alaves taldeko filialarekin. Eibar C izan zen aurkaria eta gipuzkoarrak 2-1 gailendu ziren.
Atezain luiaondoarrak ezer gutxi egin ahal izan zuen bi goletan. Batean bera bakarrik geratu zen aurrelari baten kontra. Bestean, aldiz, nahasmena egon zen defentsan eta Eibarreko jokalari batek bakarrik jaurti ahal izan zuen.
Larunbateko partidarekin urrats garrantzitsua eman du Gandariasek, berez, aiararra kadete taldeko kidea da eta. Edonola ere, Alaveseko filialaren bi atezainen lesioek ireki diote bidea debuta aurreratzeko.
Izan ere, Gandarias uda honetan hasi da entrenatzen klubeko bigarren taldearekin, atezain titularrak lesioa izan baitzuen. Gainera, Euskal Ligako beste atezainak ere lesioa izan zuen pasa den astean -mina zuen aurretik eta medikuek berretsi zuten egoera- eta, gauzak hala, Sarairen unea heldu zen larunbatean. Gandariasek aipatu zion Aiaraldea Komunikabideari apur bat urduri zegoela, baina oso pozik.
Dena den, kadete kategorian jarraitzen du luiaondoarrak eta igandean bertan talde horrekin jokatu zuen. Duela lau urte Alavesera heldu baino lehen, aiararra Amurrioko Etorkizuna klubeko, Altzarrateko eta Ugaoko jokalaria izan da eta Futbol emotion atezainen txapelketa irabazi zuen 2017an.