Asteburu interesgarria izango dute ziklokros zaleek Aiaran. Izan ere, eskola arteko lasterketa egongo da larunbatean, 16:00etatik aurrera Ibaguengo kirol gunean. Dena dela, gazteen proba hori hurrengo egunean lehiatuko den Arabako Txapelketaren janaurrekoa baino ez da izango.
Hain zuzen, igandean 10:00etatik aurrera Aiala Txirrindulari Elkarteak eta Iñaki Isasi Taldeak antolatuko dute hitzordu garrantzitsu hori eta, gainera, espero dute tokiko zenbait kirolari lehenengo postuetan egotea, nahiz eta 400 parte hartzaile inguru aurreikusi dituzten.
Izen-abizen horien artean daude Hodei Muñoz luiaondoarra eta Lukene Trujillano amurrioarra (Euskadiko Txapeldun izatea lortu zuten iaz biek, toki berean), Asier Beraza arespalditzarra, Iñigo Uria amurrioarra, Iker Colmenero, Ion Egia eta Mirari Gotxi. Azken hiru horiek emaitza oso positiboak eskuratu zituzten pasa den astean Igorren; bigarren, hamargarren eta laugarren izan baitziren, hurrenez hurren.
Ordutegiari dagokionez, kategoriaka aterako dira irteeratik, orden honetan:
- 10:00etan Master 40, 50 eta 60
- 11:00etan Kadeteak, gizonak eta emakumeak
- 12:00etan Junior gizonak eta Open emakumeak eta Master emakumeak
- 13:00etan Open gizonak eta Master 30 gizonak
- 14:15ean sari banaketak