Igandean 12:30ean jarri dute zita Luiaondoko udal bulegoaren parean, lan heriotzak ikusarazteko kontagailua inauguratzeko. Azken hilabeteetan Amurrion, Laudion eta Orozkon jarri dituzte kontagailuak, eta Urduñan ere jarriko dute laster.
Ekitaldiarekin lan heriotzak salatu nahi dituzte Greba Batzordeko kideek. Izan ere, taldeak zabaldu duen informazioaren arabera, 2022an 69 langile hil ziren Euskal Herrian lanean ari zirela. Horietako 9 Araban izan ziren, azkena 2022ko abenduaren 7an, Iruraiz Gaunan, istripu ez traumatiko baten ondorioz.
Tamalez, 2023an ez da joera aldatu, eta kontagailua ezingo dute zeroan jarri; astelehen honetan bertan -urtarrilaren 9an- 53 urteko Laudioko behargina hil baitzen Izarrako Kutxabankeko bulegoan, hau ere lan istripu ez traumatiko baten ondorioz. LAB sindikatuak jakinarazi duenez, goizeko lehen orduan izan zen ezbeharra, langilea bulegoan bakarrik zegoela. Sindikatuak argitara eman duen informazioaren arabera, 2022an 23 izan ziren heriotza ez traumatikoak Euskal Herrian, “arazo kardiobaskularrak eragiten dituzten faktore laboralak tarteko”.
LABen arabera, “ez da kasualitatea Kutxabank bezalako enpresetan arrisku faktore hau areagotu izana”. Bere pribatizazioak langileen lan baldintzetan eta bizi kalitatean eragin duela salatu du, besteak beste, gutxienez bi langile egoteko segurtasun neurria bertan behera utzi baitute, “gastuak gutxitzeko”. “Posible da neurri hori ezabatu ez balitz, gaur heriotza baten aurrean ez egotea”, adierazi du sindikatuak ohar bidez.
