Urteak 15 egun ditu gaurkoan, eta hiru dira honezkero euren lanpostuetan bizitza galdu duten Euskal Herriko langileak. Errealitate lazgarri hori "ez normalizatzeko" helburuarekin, lan-heriotzen kontagailuak jarri ditu Aiaraldeko Greba Batzordeak eskualdeko udalerrietan. Iragan apirilean Amurrion abiatutako dinamikari jarraipena eman diote horrela. Hartara, Laudion, Aiaran eta Orozkon jarri dituzte kontagailuak berriki, eta aurki Urduñan ere horrelako panel bat jarriko dutela iragarri dute.
Ekimen berria jendaurrean aurkeztu eta azken lan-heriotzak salatzeko asmoz, ekitaldi xumea antolatu dute gaur goizean Luiaondon, Aiarako kontagailu berriaren aurrean. Oso presente izan dituzte aurten lanean hildako hiru beharginak, baita 2022an Euskal Herrian bizia galdu zuten 69ak ere bai. Halaber, aipamen berezia egin diote 2020an Aiarako Zorroza Gestión de Residuos enpresan bizia galdu zuen Bassirou Dione jatorri senegaldarreko langileari, 2017tik gaurdaino lanean hildako 16 aiaraldearretako bat dena.
"Lan heriotzak icebergaren punta baino ez dira. Prekarietatea egiturazkoa da, eta, zoritxarrez, gure egunerokotaren parte bilakatu da. Horren adibide dira kontraturik gabeko lanak, praktika-kontratuak, kontraten hedapen inkontrolatua, eta azpikontraten kontratazioa", azpimarratu dute Greba Batzordeko kideek Luiaondoko ekitaldian.