Urte amaieran onartu zuen Arabako Foru Gobernu Kontseiluak Kexaako monumentu multzoa eta zenbait erlikia eta erlijio-objektu erosteko 2.694.000 euroko inbertsioa. Joan den ostiraleko -otsailak 10- Batzar Nagusietako Presidentzia Batzordean, Ramiro Gonzalez ahaldun nagusiak iragarri zuen Arabako Foru Aldundiak ideia lehiaketa abiatuko zuela multzoa “elementu dinamizatzaile eta eragile” bilakatzeko. Bilkura berean, baina, Elkarrekin Podemos-IUk planifikazio eta antolamendu eza leporatu zion foru erakundeari.
Foru Aldundiak, bere aldetik, aurreratu zuen dagoeneko ideia lehiaketa bat diseinatzen ari dela “monumentu multzoak Eskualdearen elementu dinamizatzaile eta eragile gisa balio beharko duen prozesu batean lehen urratsak eman ahal izateko”. Aste honetan bertan formalizatu ditu ahaldun nagusiak salerosketako eskritura publikoak eta epe labur eta ertaineko estrategia jarri du martxan.
Lehenengo neurri gisa, monumentu multzoko elementu guztien egoera eta identifikazioa aztertu nahi dituzte, urgentziazko ekintzei heldu ahal izateko eta haien kontserbazioa ziurtatzeko. Horrez gain, Kapera, Aiarako jaun-andreen eta familiaren hilobia eta Dorrea bisitagarriak izan daitezen egin beharreko jarduketak aurreikusi dituztela azaldu du.
Gonzalezek argitu zuen Aldundiaren asmoa gune horiek urtea amaitu baino lehen irekitzea dela. Halaber, diputatuak jakinarazi zuen egun Elizbarrutiko Arte Museoan dauden obrak berreskuratzeko lanean ari direla, "jatorrizko kokalekuan ikus daitezen”.
Elkarrekin-Podemos-IU koalizioarentzat “ez da batere logikoa Aldundiak Kexaako Monumentu Multzoa 2,7 milioiren truke eskuratzeak planifikaziorik gabe, zein erabilera emango dion zehaztu gabe eta mantentze- eta birgaitze-gastuak zenbatekoak diren jakin gabe”. Elkarrekin Podemos-IUk gaineratu zuen “oraindik badaudela foru jabetzako beste eraikin batzuk, erabilera zehaztuta ez dutenak, hala nola Izarrako ikastetxea”.